Ֆրանչիսկոս Սրբազան Քահանայապետի գործունէութիւնը` Կարտինալական Խորհուրդի հետ ժողով։

Երեքշաբթի, 29 ապրիլի առաւօտեան, Ֆրանչիսկոս Սրբազան Քահանայապետը մասնակցեցաւ Կարտինալական ''ութեակ'' խորհուրդի ժողովներուն որոնք սկիզբ առին երէկ` 28 ապրիլի առաւօտեան եւ վերջ կը գտնեն վաղը` 30 ապրիլին։ Սրբազան Հայրը ապա ժամը 12-ին ընդունց Փարակուայի Հանրապետութեան նախագահը` Տիար Օրասիօ Մանուէլ Քարդէս Եարա, անոր կողակիցը եւ իրենց ընկերացող շքախումբը, հուսկ 12,30-ին ընդունեց Չիլէի հանրապետութեան մօտ առաքելական դեսպան` գերապայծառ Իվօ Սքափոլօ։
Կարտինալական Խորհուրդի ժողովի մասին հրատարակած մէկ հաղորդագրութեան մէջ, Սուրբ Աթոռի մամլոյ գրասենեակի տնօրէն` Հայր Ֆետերիքօ Լոմպարտին յայտնեց թէ` Սրբազան Քահանայապետը իր մասնակցութիւնը կը բերէ կարտինալական ութեակ խորհուրդի ժողովի գրեթէ բոլոր նիստերուն եւ թէ այդ ժողովներուն կը մասնակցի նաեւ Վատիկանի Պետքարտուղարը Կարտինալ Փիէթրօ Փարոլինը։ Հայր Լոմպարտի մատնանշեց ապա թէ երկուշաբթի օրուայ յետմիջօրէի նիստերուն ընթացքին, ժողովականները ունկնդրեցին Սուրբ Աթոռի վարչական եւ տնտեսական հարցերու ուսումնասիրութեան եւ տեղեկատուութեան Քահանայապետական յանձնախումբի նախագահ` Փրօֆ Ժոզէֆ Զահրայի զեկոյցը, իսկ այժմ կը շարունակեն քննարկել Քահանայապետական Խորհուրդներու հարցերը։
Կարտինալական խորհուրդը մտադիր է նոր ժողով մը գումարել յառաջիկայ Յուլիս 1 մինչեւ 4։ Յայտնենք որ կարտինալական խորհուրդը մինչեւ օրս գումարեց, չորս նիստեր 1-3 հոկտմբեր 2013, 3-5 դեկտեմբեր 2013, 17-19 փետրուար 2014 եւ 29-30 ապրիլ 2014։ Հայր Լոմպարտին ապա հաղորդագրութեան մէջ յայտնեց թէ յառաջիկայ 2 մայիսին տեղի կ՛ունենայ ''Տնտեսութեան Խորհուդի'' առաջին նիստը։